Hestamannafélagið Fákur

Hestamannafélagið Fákur var stofnað 24. apríl 1922 af nokkrum áhugasömum hestamönnum í Reykjavík en sami hópur hafði hist 29. mars til að ræða stofnunina. Hestamannafélagið Fákur var fyrsta hestamannafélagið á Íslandi og þar af leiðandi það elsta.

Fyrsti formaður félagsins var Daníel Daníelsson. Markmið félagsins var „að efla áhuga og þekkingu á ágæti hesta og hestaíþróttum og stuðla að rjettri meðferð þeirra“ eins og segir í fyrstu lögum félagsins. Enn fremur hugði félagið að byggingu skeiðvallar þar sem hægt væri að efna til kappreiða á hverju ári.

Fyrsti skeiðvöllur Hestamannafélagsins Fáks var síðan gerður inn við Elliðaár og fyrstu kappreiðarnar fóru fram í júlí 1922 og var hann notaður allt til ársins 1971 þegar nýr völlur í Víðidal var tekinn í notkun á félagssvæði Fáks. Í Víðidal eru nú rekin á vegum Hestamannafélagsins Fáks hesthús, félagsheimili, skeiðvöllur og reiðhöll.