Rauði kross Íslands, Reykjavíkurdeild

Rauði Krossinn Íslands var stofnaður 1924 og sá um öll verkefna félagsins í Reykjavík, þar til Reykjavíkurdeild Rauða krossins var stofnuð 27. apríl 1950. Jón Auðuns dómprófastur var kjörinn fyrsti formaður deildarinnar.

Á aðalfundi þann 28. mars 2013 var samþykkt að nafni deildarinnar, Reykjavíkurdeild Rauða krossins, yrði breytt í Rauði krossinn í Reykjavík.

Frá því deildin var stofnuð hefur umfang hennar aukist jafnt og þétt. Verkefnaval er fjölbreytt og sinna liðlega 600 sjálfboðaliðar á öllum aldri margskonar störfum í þágu samfélagsins í hverjum mánuði.

Kvennadeild Reykjavíkurdeildar Rauða kross Íslands var stofnuð árið 1966 af stórhuga konum og er það grunnurinn að starfi deildarinnar í dag. Frú Ragnheiður Guðmundsdóttir augnlæknir átti hugmyndina að stofnuninni en hún hafði kynnst sjálfboðastörfum kvenna í Rauða kross starfi í Bandaríkjunum og víðar. Hún sá þörf fyrir slíka starfsemi hérlendis. Fyrsti formaður Kvennadeildarinnar var Sigríður Thoroddsen, 1966-1971.