Samtök foreldra og aðstandenda samkynhneigðra - FAS Samtök foreldra og aðstandenda hinsegin fólks - FAS

Samtök foreldra og aðstandenda samkynhneigðra, FAS voru stofnuð þann 1. nóvember 2003. Stofnundinn sátu um 60 manns.

Í upphafi fundar bauð Harpa Njáls fólk velkomið og sagði frá starfi foreldra og aðstandenda samkynhneigðra. Foreldrar komu fyrst saman á vettvangi Samtakanna ’78 árið 1987 og árið 1997 starfaði hópur um nokkurn tíma. Hópurinn sem stendur að stofnun FAS hefur starfað samfellt frá árinu 2000 og staðið fyrir fræðslu fyrir foreldra og aðstandendur, bæði með stuðningsfundum tvisvar í mánuði og einnig með fræðslufundum. Fram kom að mikil vinna hefur verið lögð í hugmyndafræði og uppbyggingu starfsins og ljóst að mikil þörf er fyrir það. Sú ákvörðun að festa starfið í formleg samtök er m.a. til þess að fyrirbyggja að sú vinna glatist, heldur sé hún til staðar þrátt fyrir mannabreytingar. Við stofnun samtaka foreldra og aðstandenda samkynhneigðra afhenda þeir aðilar sem lagt hafa fram krafta sína við að móta hugmyndafræði og uppbyggingu foreldrastarfsins sl. þrjú ár, sitt framlag, sem þar með verður hornsteinn FAS.

FAS starfar í náið og með stuðningi Samtakanna ´78. Á ofangreindum fundi gat Þorvaldur Kristinsson formaður Samtakanna ‚78 þess að víða erlendis væri nú talað um íslenska undrið þegar horft væri til þess sem gerst hefur á Íslandi í málefnum samkynhneigðara á tveimur áratugum en minnt um leið á þá staðreind að í heimi samkynhneigðra hér á landi eru viðhorf foreldra og aðstandenda tvískipt: Þar finnst annars vegar skilyrðislaus ást aðstandenda og stuðningur – og einnig grimmd og útskúfun. Þær andstæður mætti líta sem drifkraft til að vísa fram veginn. Margrét Pálmadóttir rifjaði upp foreldrastarf á ár árunum 1997-1998 sem fór fram á Lindargötu 49, húsi Samtakanna ´78. Hún benti á að enn krauma í þjóðfélaginu vanþekking og fordómar – þess vegna er baráttan erfið og nóg starf fyrir höndum hjá FAS.

Stofnfélagar FAS teljast allir þeir sem skrá sig í samtökin fram að aðalfundinum 2003. Fyrstu stjórn skipuðu: Harpa Njáls, Guðrún Þórarna Þórarinsdóttir, Ingibjörg S. Guðmundsdóttir og Sigfinnur Þorleifsson**. Ingibjörg S. Guðmundsdóttir var síðan formaður 2007-2008, Guðrún Rögnvaldardóttir 2008-2013 og Rebekka Ýr Helgudóttir frá 2013. (M.a. byggt á grein úr Samtakafréttir, desember 2003).

Nafni félagsins var breytt á aðalfundi þess 29. október 2013 í FAS – Samtök foreldra og aðstandenda hinsegin fólks.