Langholtsskóli

Eftir að byggð og íbúafjöldi óx í Langholtinu á fimmta áratug tuttugustu aldar, þótti aðkallandi að byggja skóla fyrir hverfið, og tók bæjarstjórn Reykjavíkur þá ákvörðun 1948 að Langholtsskóli yrði byggður. Einar Sveinsson og Gunnar Ólafsson húsasmíðameistarar teiknuðu bygginguna, og hófst vinna við hana í maí 1949 og varð hún fokheld í september 1951.

Skólinn tók til starfa 15. nóvember 1952, og fyrsti skólastjóri var Gísli Jónasson. Fyrsta skólaárið voru 18 kennarar og 676 nemendur á aldrinum 7-12 ára. Nemendum Langholtsskóla fjölgaði ört á næstu árum, og kom í ljós að húsnæðið var ekki nógu stórt. Var þá brugðið á það ráð að leigja hluta af húsi Ungmennafélags Reykjavíkur við Holtaveg, sem þá var nýlega búið að byggja. Skólaárið 1957-1958 fór einnig fram kennsla í 1. bekk gagnfræðastigs, og allt næsta ár voru 1. og 2. bekkur gagnfræðastigs Vogaskóla, sem þá var í byggingu, starfræktir undir stjórn og umsjón Langholtsskóla. Flestir urðu nemendur veturinn 1958-1959, 1190 talsins, og var skólinn þá þrísetinn, allt að átta bekkjardeildir í hverjum árgangi og oft kennt til klukkan sjö á kvöldin. Í desember 1958 fluttu unglingadeildirnar í ófullgert húsnæði Vogaskóla við Gnoðarvog, og þegar hann tók að fullu til starfa haustið 1959, fluttust öll sjö til tíu ára börn úr suðurhluta skólahverfisins þangað. Fækkaði nemendum Langholtsskóla þá í um 900 og í um 850 árið eftir. Voru þeir síðan oftast á bilinu 900 – 1000 til ársins 1976.

Haustið 1961 tók 1. bekkur gagnfræðastigs aftur til starfa og árið eftir 2. bekkur, og varð sú skipan að unglingadeildirnar voru í skólabyggingunni sjálfri en yngstu börnin höfð í leiguhúsinu við Holtaveg. Með þessa bekkjaskipan starfaði skólinn til ársins 1970, en þá hófst rekstur forskóladeildar.

Með tilkomu grunnskólalaganna 1974 var ákveðið að bæta 9. bekknum við svo skólinn yrði fullgildur grunnskóli. Frá árinu 1990 hefur Langholtsskóli starfað sem heildstæður grunnskóli með 1. til 10. bekk.

Vegna hinnar miklu fólksfjölgunar í hverfinu um 1960 var ákveðið að stækka skólann og var það gert í tveimur áföngum, fyrst 1962, viðbygging með nýrri kennarastofu, anddyri og skrifstofum yfirmanna, og var sú eining tekin í notkunn árið eftir, en seinni einingin, austurálman með kennslueldhús, húsvarðaríbúð og fimm almennum kennslustofum var tekin í notkun 1967. Árið 1976 var vesturálman tekin í notkun og 9. bekkur tók til starfa. Þannig starfaði skólinn til 1990, en þá var forskóladeild sex ára barna gerð að 1. bekk og breyttust þá önnur bekkjarnúmer í samræmi við það.

Í Langholtsskóla varð einsetning að veruleika veturinn 1995 – 1996, en unglingadeildirnar voru einsetnar árið 1976.

Árið 1961 lét Gísli Jónasson af störfum skólastjóra, og tók þá Kristján J. Gunnarsson, sem hafði verið yfirkennari frá því skólinn tók til starfa. Í námsleyfi Kristjáns, frá og með haustinu 1967, var Erling S. Tómasson, einn af kennurum skólans, settur skólastjóri þangað til Kristján kom úr leyfi síðla vetrar. Kristján lét af störfum 1973, er hann varð fræðslustjóri í Reykjavík, og var þá Erlingur skipaður skólastjóri við skólann. Vorið 1996 lætur Erling af starfi skólastjóra og við starfi hans tekur Erna M. Sveinbjarnardóttir, sérkennari. Erna var skólastjóri við skólan til ársins 2001, þegar núverandi skólastjóri (apríl 2007), Hreiðar Sigtryggsson, tók við stöðu skólastjóra.

Afhending: 2005, ágúst 2007, mars 2011, maí 2012, desember 2015 og október 2018.

Erna M. Sveinbjarnardóttir 15. októiber 2018.

Innihald: Fundargerðir, bréfa- og málasafn, námsmat, einsetning, einstaklingsmál, prófskíteini, próf, kladdar – dagbækur, nemendafélag, starfsmannamál, fréttbréf o.fl.

Tími: 1952-2010

Magn: 162