Minjasafn Reykjavíkur - Árbæjarsafn

Árbæjarsafn var stofnað 1957 sem útisafn til að gefa almenningi hugmynd um byggingarlist og lifnaðarhætti fyrr á tímum. Árbæjarsafn er minjasafn Reykjavíkur og hefur hlutverk á sviði minjavörslu, rannsókna og miðlunar í formi safnfræðslu, sýninga og útgáfu. Borgarminjavörður er forstöðumaður þess.

Árbæjarsafn var fyrst hugsað sem deild í Skjala- og minjasafni Reykjavíkur, svonefnt útisafn, þar sem umhverfi liðinna kynslóða yrði sviðsett á sannfærandi hátt. Árbæjarsafni var því ekki ætlað hlutverk eiginlegs byggðasafns með víðtækar söfnunar- og rannsóknarskyldur. Þess vegna var minjasafnið starfrækt áfram í Skúlatúni 2 og var þar opnaður sýningarsalur árið1958.

Árið 1968 voru Minjasafn Reykjavíkur og Árbæjarsafn sameinuð undir nafni hins síðarnefnda. Þá var einnig samþykkt í borgarstjórn að koma á fót embætti borgarminjavarðar og var fyrst ráðið í það starf 1974. Fyrsti borgarminjavörðurinn var Nanna Hermansson (1974-1984), við af henni tók Ragnheiður Þórarinsdóttir (1984-1989) síðan Margrét Hallgrímsdóttir (1989-2000). Núverandi borgarminjavörður er Guðný Gerður Gunnarsdóttir (2000-2014).

Safnið er á landi Árbæjar, rótgróinnar bújarðar, sem er fyrst nefnd árið 1464 í rituðum heimildum. Árbær var meðalstórt býli og bjuggu þar lengi tvær fjölskyldur. Síðasti ábúandinn flutti burt árið 1948. Flest húsin í Árbæjarsafni hafa verið flutt úr miðbæ Reykjavíkur. Safnkirkjan er frá 1842 og í henni fara enn fram kirkjulegar athafnir.

Í Árbæjarsafni hafa verið hin síðari ár ýmsar sýningar og viðburðir hverja helgi sem dregið hafa að sér fjölda gesta. Á aðventunni er vinsæl jólasýning, þar sem sýndar eru hefðir Íslendinga við undirbúning jólanna. Árbæjarsafn er minjasafn Reykjavíkur, í senn útisafn og byggðasafn. Markmið þess er að gefa almenningi innsýn í lifnaðarhætti, störf og tómstundir Reykvíkinga fyrr á tímum.

Minjasafn Reykjavíkur var lagt niður og nýtt sameinað safn tók við. Safnið hlaut nafnið Borgarsögusafn Reykjavíkur var opnað í júní 2014. Undir því nafni sameinast Árbæjarsafn, Landnámssýningin Aðalstræti, Ljósmyndasafn Reykjavíkur, Sjóminjasafnið í Reykjavík og Viðey.

Afhending skjalasafns: Gerður Róbertsdóttir í nóvember 1998, Andrea Ævarsdóttir í júní 2014 og Sólveig Kristín Jónsdóttir í júlí 2015

Innihald: Bréf, sýningar, sumarstarf, kynningar, fornleifarannsóknir, húsavernd o.fl

Tímabil: 1971-1997, 1998-2012, 2002-213

Skjalaskráin er gerð á löngum tíma, en uppfærð í núverandi form árið 2015.