Gísli Halldórsson afhendir skjöl sín til Borgarskjalasafns

Á 94 ára afmælisdegi sínum þann 12. ágúst 2008 afhenti Gísli Halldórsson einkaskjalasafn sitt til eignar og varðveislu á Borgarskjalasafni Reykjavíkur. Einkum er um að ræða skjöl tengdum störfum Gísla fyrir íþróttahreyfinguna og Ólympíunefnd Íslands. Einnig eru í safninu skjöl um arkitektúr, skipulagsmál í Laugardal og borginni og um einstakar byggingar.

Gísli Halldórsson er fæddur þann 12. ágúst 1914. Hann lauk prófi úr Iðnskólanum í Reykjavík 1933 og tók sveinspróf í húsasmíði. Hann stundaði arkitektanám í Danmörku, starfrækti teiknistofu með Sigvalda Thordarson í Reykjavík á stríðsárunum en hélt síðan aftur til Kaupmannahafnar og tók lokapróf frá arkitektúrdeild Det Kongelige Akademi for de Skönne Kunster 1947.

Hann rak einn teiknistofu í Reykjavík til 1957 og síðan í félagi við aðra rak hann eina stærstu arkitektastofu landsins, Teiknistofuna Ármúla 6. Gísli var afkastamikill arkitekt og eftir hann liggja fjöldi þekktra bygginga. Á verkefnalista stofu Gísla má nefna margvísleg íþróttamannvirki í Laugardal, Hótel Loftleiðir, Lögreglustöðina í Reykjavík, Tollstöðvarhúsið í Reykjavík, verkamannabústaði í Breiðholti, félagsheimili víða um land, flugstöðvar á Akureyri og Egilsstöðum, fjölbýlishús við Birkimel og eigið hús við Tómasarhaga 31. Einnig vann hann margvísleg trúnaðarstörf fyrir arkitekta.

Auk þess lét Gísli mikið að sér kveða á sviði stjórnmála og íþróttamála. Hann var varaborgarfulltrúi frá 1954 og borgarfulltrúi frá 1958. Hann átti sæti í borgarráði Reykjavíkur 1962-1970, forseti borgarstjórnar 1970-74 og átti sæti í fjölda ráða og nefnda borgarinnar. Hann var í stjórn Íþróttabandalags Reykjavíkur frá stofnun 1944 til 1962 og formaður frá 1949 til 1962. Gísli var forseti Íþróttasambands Íslands 1962-1980, í Ólympíunefnd Íslands í 32 ár, varaformaður í 18 ár og síðan formaður frá 1972-96. Auk þess sinni hann margvíslegum trúnaðarstörfum fyrir íþróttahreyfinguna bæði hérlendis og á Norðurlöndum.

Gísli Halldórsson hlaut fjölda viðurkenninga fyrir störf sín að félagsmálum, þar á meðal stórriddarakross fálkaorðunnar. Hann var gerður að heiðursforseta Íþróttasambands Íslands 1980 og heiðursfélaga Arkitektafélags Íslands 2002.

Nánari upplýsingar um líf og störf Gísla má finna hér.