Starfsfólk Borgarskjalasafns óskar öllum gleðilegs sumars með þökk fyrir veturinn sem senn er að líða.
Í tilefni dagsins langar okkur að sýna ykkur brot úr bók sem kom upp við skráningu einkaskjalasafns. Bókin er sjóðbók yfir viðhald á húsum Bessastaða og nær yfir árin 1941– 1946. Í bókinni er ekki aðeins viðhald fyrir ríkisstjórabústaðinn að finna, sem síðar verður að forsetabústað, heldur einnig viðhaldskostnað á húsnæði fjósamanns, starfsmannahúss, gamla útihússins, fjósið og hlöðubygging ásamt viðhaldskostnaði á húsmunum ríkisstjórabústaðarins. Ætla má að bókin hafi verið haldin af staðarhaldara, ráðsmanni eða bústjóra Bessastaða á þeim tíma. Inni í téðri bók var svo að finna bréf til skipulagsnefndar atvinnumála í Reykjavík sent frá Akureyri fyrir 89 árum, næstum upp á dag. Bréfið hefur að geyma upplýsingar um verkun fisks á Norðurlandi þ.e. á Siglufirði, Ólafsfirði, Akureyri, Dalvík og Húsavík ásamt verðlagningu.
Hefur þú kenningu á því hvernig bréfið endaði í þessari sjóðbók? Ef svo er þá viljum við heyra af því í gegnum netfangið okkar borgarskjalasafn@reykjavik.is
Til að stækka skjölin er hægt að smella á myndirnar.
Mynd 1.1
Viðhaldskostnaður bústaðs ríkisstjóra á Bessastöðum árið 1941 og viðhaldskostnaður á bústað forseta Íslands árið 1945.