Jólin í bréfaskrifum kvenna.
Í þriðju „jólagrein“ Borgarskjalasafns Reykjavíkur skyggnumst við í bréfasafn Guðlaugar (Lóu) Elínar Úlfarsdóttur (f. 1918 - d. 2002) hannyrðarkonu í skjalasafni hennar nr. E-239.
Bréfin voru send af vinkonum Guðlaugar sem þá var á sextánda aldursári til hennar í ársbyrjun 1934. Þar lýsa vinkonurnar fyrir Guðlaugu, eftir hennar ósk hvað þær gerðu yfir jólahátíðarnar árið 1933, svo sem gestagangi og ekki síst hvað þær fengu í jólagjafir.
Jólagjafirnar innihéldu meðal annars vasaklúta, manikjúrkassa, höfuðvatnsglas og fjölmörg kort. Bréfaskrifari fór í mörg boð, dansaði, söng og spilaði svo fátt eitt sé nefnt.
Martha fékk silkiundirföt, 20 króna permanent krullur, silkisokka, vasaklúta, bréfsefni, herðatré, handmálaða silkivasaklúta og fjögur sokkabönd í jólagjöf. Hún fór einnig á jólaball á Hótel Borg, keypti sér kjól fyrir jólin og fallega svarta rúskinsskó. Eins og hún lýsir því sjálf þá hafi hún „ekki haldið kyrru fyrir um jólin.“